صدر زرداري سنڌ ۾ ايم ڪيوايم، فنڪشنل، اي اين پي ۽ پارٽين ٻين سان مڪاني چونڊن ۾ سيٽ ايڊجسٽمينٽ لاءِ پير مظهر ۽ قادر پٽيل تي ٻڌل ڪميٽي جوڙي ڇڏي

مڪاني نظام متحده جي صلاح سان تيار ٿيڻ کپي، اتحادين کي ناراض نه ڪيو وڃي: زرداري

ڪراچي (اسٽاف رپورٽر) : صدر آصف علي زرداري پاڪستان پيپلزپارٽي جي صوبائي قيادت کي هدايت ڪئي آهي ته سنڌ ۾ مڪاني نظام متحده جي صلاح سان  تيار ڪيو وڃي ۽ ايم ڪيو ايم کي ناراض ڪرڻ بدران گڏ کڻي هلڻ جي ڪوشش ڪئي وڃي. جڏهن ته صدر سنڌ ۾ فنڪشنل ليگ، اي اين پي ۽ ٻين اتحادين سان سيٽ ايڊجسٽمينٽ لاءِ ٻه رڪني ڪميٽي قائم ڪري ڇڏي آهي. صدر آصف علي زرداري جي صدارت هيٺ اعليٰ سطحي اجلاس ڪالهه بلاول هائوس ۾ ٿيو. جنهن ۾ سنڌ جي وڏي وزير سيد قائم علي شاهه، وقتي گورنر نثار احمد کهڙي، سينيئر وزير پير مظهر الحق، سنڌ ۽ وفاقي ڪابينا جي ڪيترن ئي وزيرن شرڪت ڪئي. اجلاس ۾ پيپلزپارٽي صدر کي مڪاني ادارن جي نئين نظام، ايم ڪيو ايم سان ان سلسلي ۾ ٿيل گڏجاڻين ۽ ايندڙ مڪاني چونڊن جي سلسلي ۾ بريفنگ ڏني وئي. ذريعن موجب پيپلزپارٽي جي وزيرن ۽ اڳواڻن صدر آڏو شڪايت ڪندي چيو ته ايم ڪيو ايم سنڌ ۾ مرضي جو نظام لاڳو ڪرائڻ چاهي ٿي. جنهن سان ڪراچي مڪمل طور تي ۽ سنڌ جا ٻيا شهر حيدرآباد، ميرپورخاص، سکر ۽ نوابشاهه به گهڻي حد تائين ايم ڪيو ايم حوالي ٿي ويندا. ان سان پ پ کي سنڌ ۾ وڏو نقصان ٿي رهيو آهي. ذريعن مطابق صدر پ پ جي وزيرن ۽ اڳواڻن جي شڪايت کي رد ڪندي چيو ته پ پ ايم ڪيو ايم کي ڇڏڻ لاءِ ڪنهن به صورت ۾ تيار ناهي. تنهن ڪري سنڌ ۾ مڪاني نظام اهڙو ٺاهيو وڃي جنهن ۾ ايم ڪيو ايم ۽ ٻين اتحادين جي مرضي به شامل هجي. صدر ان موقعي تي پير مظهر الحق ۽ قادرپٽيل تي مشتمل ٻه رڪني ڪميٽي قائم ڪئي. جيڪا ايم ڪيو ايم، مسلم ليگ فنڪشنل، اي اين پي ۽ ٻين ڌرين سان سيٽ ايڊجسٽمينٽ ڪرڻ لاءِ ڳالهيون ڪندي.