پنجاب حڪومت جو پ پ کي حصو ڏيڻ کان انڪار، الڳ ٿيڻ جو شوق پورو ڪيو وڃي: نواز ليگ

لاهور (بيورو رپورٽ): پنجاب حڪومت پيپلز پارٽي جو چاليهه سيڪڙو حصي وارو مطالبو رد ڪري ڇڏيو آهي. وزيراعليٰ پنجاب جي صدارت ۾ ٿيندڙ هڪ اجلاس ۾ فيصلو ڪيو ويو آهي ته پيپلز پارٽي سان پنجاب ۾ اتحاد ڪرڻ وقت اهو معاهدو ڪيو ويو هيو ته مرڪز ۾ پيپلز پارٽي نواز ليگ کي نوڪرين ۽ فنڊن ۾ 40 سيڪڙو حصو ڏيندي ته پنجاب حڪومت به پنجاب ۾ پيپلز پارٽي کي ان فارمولي تحت حصو ڏيندي پر پيپلز پارٽي مرڪز ۾ نوڪرين ۽ فنڊن ۾ نواز ليگ کي نظرانداز ڪيو آهي. ان ڪري پنجاب ۾ پيپلز پارٽي کي 40 سيڪڙو حصو ڏيڻ جو ڪو به جواز نٿو بڻجي. ذريعن موجب اجلاس ۾ نواز ليگ جي وزيرن، وزيراعليٰ کي واضح موقف رکڻ جي صلاح ڏيندي چيو ته هو پيپلز پارٽي جي مرڪزي قيادت کي آگاهه ڪري ڇڏي ته پنجاب ۾ پيپلز پارٽي مطالبا ڪرڻ بند ڪري ۽ پهريون معاهدي تي پاڻ عمل ڪري پوءِ پنجاب حڪومت کي عمل ڪرڻ لاءِ زور ڀري. ذريعن موجب وزيراعليٰ هائوس ۾ امن امان جي حوالي سان ٿيندڙ اجلاس ۾ اهو به فيصلو ڪيو ويو ته جيڪڏهن پيپلز پارٽي پنجاب حڪومت کان الڳ ٿيڻ چاهي ٿي ته ان تي نواز ليگ کي ڪو به اعتراض ناهي.