21 اتوار , اکتوبر 2018

جعلي بينڪ اڪائونٽ ڪيس: جي آءِ ٽي پهرين اڳڀرائي رپورٽ جمع ڪرائي ڇڏي

Fake Bank Account Cases: I submitted an earlier pre-report report

اسلام آباد ( ويب ڊيسڪ ) جعلي بئنڪ اڪائونٽ ڪيس جي ٻڌڻي دوران گڏيل جاچ ٽيم( جي آءِ ٽي) پهرين اڳڀرائي رپورٽ سيل ٿيل لفافي ۾ سپريم ڪورٽ ۾ جمع ڪرائي ڇڏي جڏهن ته اعليٰ عدالت ٽرائل ڪورٽ کي اومني گروپ جا منجمد اڪائونٽ کولڻ کان روڪي ڇڏيو. چيف جسٽس آف پاڪستان ميان ثاقب نثار جي سربراهي ۾ ٽه رڪني بئنج جعلي بئنڪ اڪائونٽن ذريعي مني لانڊرنگ ڪيس جي ٻڌڻي ڪئي. ڪيس جي ٻڌڻي دوران جي آءِ ٽي سربراهه احسان صادق پهرين اڳڀرائي رپورٽ جمع ڪرائيندي عدالت کي ٻڌايو ته گهٽ وقت هئڻ سبب پريشاني کي منهن ڏيڻو پيو ۽ هن وقت تائين ٿيندڙ جاچ جو جائزو ورتو. احسان صادق ٻڌايو ته وڌيڪ 33 شڪي اڪائونٽن جو پتو لڳايو ويو آهي جن جي اسڪروٽني ڪئي پئي وڃي ۽ هن وقت تائين جاچ ۾ 334 ملوث ماڻهو سامهون آيا آهن ۽ سمورا ماڻهو اڪائونٽن ۾ ٽرانزيڪشن ڪندا رهيا. جي آءِ ٽي سربراهه چيو ته جعلي اڪائونٽن سان 210 ڪمپنين جا رابطا رهيا جنهن تي چيف جسٽس سوال ڪيو ته اڃا لانچز جو پتو ناهي پيو، ٿورو لانچ ذريعي رقم منتقلي جو به پتو لڳايو. جنهن تي احسان صادق چيو ته اڃا لانچ تائين ناهيون پهتا. چيف جسٽس رمارڪس ڏنا ته وڏي اعتماد سان جي آءِ ٽي کي اها ذميواري ڏني آهي، اڪائونٽن جو مقصد اهو ئي آهي چوري ۽ حرام جي پيسي کي جائز بڻايو وڃي. چيف جسٽس چيو ته هڪ اهم ڪردار عارف خان به آهي جنهن تي جي آءِ ٽي سربراهه ٻڌايو ته هو پرڏيهه ۾ آهي، ڪنهن ملڪ ۾ آهي هن وقت ظاهر نٿو ڪري سگهان. احسان صادق چيو ته جيڪي ڏوهاري ملڪ کان ٻاهر آهن انهن کي واپس آڻڻ لاءِ ڪوششون ڪري رهيا آهيون جنهن لاءِ ڏوهارين جي ريڊ وارنٽن لاءِ قدم کڻي رهيا آهيون جڏهن ته جاچ لاءِ نيب، ايف بي آر، آيس اي سي پي ۽ اسٽيٽ بئنڪ کان رڪارڊ وٺي رهيا آهيون. جي آءِ ٽي سربراهه وڌيڪ ٻڌايو ته جعلي اڪائونٽن ۾ ڪانٽريڪٽرن رقم جمع ڪرائي آهي جنهن تي جسٽس عطاءَ بنديال سوال ڪيو ته ڇا رقم ڪراس چيڪ ذريعي اڪائونٽن ۾ جمع ٿي؟ احسان صادق ٻڌايو ته جعلي اڪائونٽن واري معاملي جو جائزو وٺڻو پوندو، ڪمپنين ۾ 47 جو سڌو سنئو واسطو اومني گروپ سان آهي. چيف جسٽس پاڪستان سوال ڪيو ته اومني گروپ جون ڪيتريون شگر ملون آهن، جنهن تي جي آءِ ٽي سربراهه ٻڌايو ته 16 شگر ملون آهن. چيف جسٽس چيو ته جي آءِ ٽي جو خرچ اومني گروپ تي وجهنداسين، پيسا ٻيا کائين ۽ خرچ سرڪار ڇو ڪري. ان موقعي تي اومني گروپ جي سربراهه انور مجيد ۽ عبدالغني جي وڪيل جي آءِ ٽي جو خرچ ڏيڻ کان انڪار ڪندي چيو ته اسان جا سمورا اڪائونٽ منجمد آهن، ملازمن کي پگهارون ڏيڻ لاءِ به پيسا ناهن. چيف جسٽس اومني گروپ جي وڪيل سان مڪالمو ڪندي چيو ته گهر کپائي خرچ لاءِ جي آءِ ٽي کي پيسا ڏيو جنهن تي وڪيل چيو ته اثاثا ۽ بئنڪ اڪائونٽ منجمد آهن. عدالت حڪم ڏنو ته ٽرائل ڪورٽ اومني گروپ جا اڪائونٽ کولڻ تي فيصلو نه ڏئي، آرٽيڪل 184 تحت اسپيشل ڪورٽ کي حڪم جاري ڪرڻ کان روڪيون ٿا ۽ خاص عدالت جعلي بئنڪ اڪائونٽن بابت سپريم ڪورٽ کي آگاهه ڪرڻ کانسواءِ حڪم جاري نه ڪري. جنهن بعد عدالت جعلي بئنڪ اڪائونٽن واري ڪيس جي ٻڌڻي 10 ڏينهن لاءِ متلوي ڪري ڇڏي.

هي به ڏسي سگهو ٿا

صوبن ۾ اتفاق راءِ سان ئي آبي مسئلا حل ڪري سگهجن ٿا: سرتاج عزيز

اسلام آباد(ويب ڊيسڪ) ناليواري اقتصاديات جي ماهر سرتاج عزيز چيو آهي ته صوبن اتفاق رائي …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے